มื้อนี้ หนูข้าวเม่า มีเมนูเปิบพิสดาร แต่สุดแซบมาฝากพี่น้องหมู่เฮาทุกคนจ้า ฮู้บ่ว่าผงสีเขียวๆนั่นมันคืออิหยัง มันก็คือ บักไข่ผำ นั่นเอง ผำ มีรูปร่างเป็นเม็ดน้อยๆ ทรงรี ขนาดประมาณ 1 – 2 มิลลิเมตร เกิดตามธรรมชาติในหนองน้ำที่มีน้ำนิ่งใส ลอยเป็นแพอยู่บนผิวน้ำ ผำ บ่มีราก สิเรียกต่างกันตามภาษาท้องถิ่น เช่น ภาคเหนือ เรียกว่า ผำ,ไข่ผำ หรือไข่แหน ภาคกลางสิเรียกว่า ไข่น้ำ การเอามาเฮ็ดเป็นอาหาร มักเฮ็ดเป็นเมนู อ่อมบักไข่ผำ เครื่องปรุงมี ไข่ผำ เนื้อหมู ปลาเข็ง หรือเนื้ออื่นๆตามที่มักกะใส่ได้เบิ่ด พริกแห้ง หอมแดง ผักชีลาว กระเทียม ตะไคร้ ต้นหอม ผักอีตู่ (ใบแมงลัก) น้ำปลา น้ำปลาแดก ผงชูรส
วิธีเฮ็ดกะบ่ยาก
1. ล้างไข่ผำ ใส่ตั้งไฟ ใส่น้ำจั๊กหน่อย
2. ใส่เครื่องแกง กะสิมี พริกแห้ง หอมแดง กระเทียม ตะไคร้ ตำใส่กันให้ละเอียด
3. เมื่อน้ำต้มผำเดือด กะใส่เนื้อหมูลงไป แล้วกะปรุงรสตามมัก ใส่น้ำปลา ปลาแดก ผงชูรส เอาให้แซบ รอให้หมูสุกจั๊กหน่อยจังปิดไฟ
4. ใส่ผักชีลาว ต้นหอม ผักอีตู่ คนๆให้เข้ากันแล้วกะปลงโลด เป็นอันเสร็จเรียบร้อย
ผู้ลางคนกะมักตำกินสด ๆ คือจังตำบักหุ่ง เอาไปเฮ็ดเป็นต้มยำกะได้ หรือสิเอาไปใส่ทอดไข่ โอ๊ยยยย แซบอีหลี ครั้งหน้าหนูข้าวเม่าสิมีเมนูเปิบพิสดารอีหยังมาฝากหมู่เฮาอีก ติดตามได้ที่ Zappnuar.com เด้อค่ะเด้ออออ