สวัสดีจ้าาา ชาว Zappnuar ซุคน มือนี่ “หนูข้าวเม่า” กะจะมาแนะนำเมนูเปิบพิสดารให้เพื่อนๆชาว Zappnuar ได้ซิมกัน เซือว่าเพื่อนๆหลายคนคงบ่เคยทานเมนูนี้กันแน่นอน หนูข้าวเม่า ขอกระซิบก่อนเลยละกันค่ะว่าหนูข้าวเม่ามักแฮง อาหารจานโปรดหนูข้าวเม่าเลยเด้เนี่ย มันแซ่บอิหลีเด้อ เมนูที่ว่านี้กะคือ “หมกฮวก” หมกฮวกคืออิหยัง เพื่อนๆอย่าฟ่าวตกใจกันเด้อ “ฮวก” ในภาษาอีสานกะคือ “ลูกอ๊อด” นั่นล่ะจ้าาา อ้าว! บ่งงกันเนาะ ฮวกกินได้อิหลีเด้อค่ะ
ก่อนสิได้กินหมกฮวก เฮากะต้องไปหาฮวกมาซะก่อน ชาวบ้านเขาสิเอิ้นว่า “ไปส่อนฮวก” บ่แม่นไปหลบฮวกเด้อล่ะ อย่าเข้าใจผิด ยามช่วงหน้าฝน กบ เขียด กะซิออกมาผสมพันธ์กัน ให้ได้มาเป็นฮวก ให้ทุกคนได้ทานกันนี่แหละค่าาา แต่ก่อนจะได้ฮวกมานั้น กะต้องไปส่อนฮวกก่อน การส่อนฮวกกะง่ายๆเลย มีสวิงกับถังน้อย กะไปส่อนฮวกได้แล้ว
พอเฮาได้ฮวกมาแล้วเฮากะจะมา “ไส่ขี่ฮวก” (ในที่นี้หมายถึงเอาใส้ของลูกอ๊อดออก) ก่อน โดยการบีบไส้ให้มันแตกเป๊าะ เอามูลมันออก บ่จั๊งซั่นมันสิแหย๋(ขยะแขยง) กินบ่แซ่บ มันสิบ่นัว วิธีการเฮ็ดกะคือกันกับการเฮ็ดหมกทั่วๆไป วัตถุดิบเฮากะมี ผักอีตู่(ใบแมงลัก) หมกฮวกขาดผักอีตู่บ่ได้ จั๊งซั่นมันบ่ครบสูตร ใส่เกลือลงไปจั๊กหน่อย บ่ใส่หลาย เดี๋ยวมันสิเค็ม เครื่องปรุงอย่างอื่นกะมีพริกดิบหั่นใส่จั๊กสองสามเม็ด หัวผักบั่วมา(ต้นหอม) ทุบใส่น้ำกะดี เอาคลุกเคล้าใส่กันแล้วกะเอามาห่อใส่ใบตองหรือสิเอาใส่หม้อกะได้คือกัน แล้วแต่วิธีเฮ็ดของแต่ละคน แต่ถ้าอยากให้มันเป็นหมกอิหลีกะต้องเอาใส่ใบตอง วิธีการเบิ่งว่าฮวกสุกดีหรือยัง เฮากะลองยกเบิ่ง ถ้าหมกใด๋น้ำหนักเบากะแสดงว่าสุกแล้ว หมกใด๋ยังหนักๆอยู่คือเก่ากะแสดงว่าบ่ทันได้สุกต้องค้างไฟต่ออีกจั๊กคราวนึง พอหมกฮวกสุกดีแล้ว กะจัดการเอาออกจากเตาไฟ แกะออกกิน แซ่บนัวบักคัก แต่มันสิแซบกว่านี้ถ้ามีบักม่วงมันมายามกินกับฮวก อันนี้หนูข้าวเม่าคอนเฟิร์มว่าแซ่บคักแซ่บแน่
เป็นจั๊งใด๋กันบ้าง หมกฮวกของเฮา หน้าตาเป็นตาแซ่บแฮงเนาะ โอ้ยว่าแล้วหนูข้าวเม่ากะอยากหมกฮวก หนูข้าวเม่าขอไปกินหมกฮวกก่อนเด้อจ้า แล้วพบกันใหม่ กับบทความหน้าหนูข้าวเม่าสิมีเมนูเปิบพิศดารอิหยังมาแบ่งให้ชมกันกะรอติดตามหนูข้าวเม่าได้ที่นี่ Zapp เว่อร์ !! เปิบพิศดาร เด้อค่ะเด้อ