มาเด้อๆ บาดหนิ หนูข้าวเม่า สิพาพี่น้องชาว Zappnuar.com มาชิมเมนูเปิบพิสดารสุดแซบที่หนูข้าวเม่ามักหลาย ปิ้งหนูนาเด้อพี่น้องเด้อ
ตามท้องนาเฮามันกะสิมีพวกศัตรูพืช เช่น นก หอยเชอรี่ แล้วกะหนูนาทั้งหลาย ไอ้ตัวพวกนี้หละเป็นอาหารอันโอชะของชาวบ้านอย่างเฮาเลยละ บ่ว่าสิเป็นทอดนก ก้อยบักหอยเชอรี่ และปิ้งหนูนาสุดแซบนิละ เมื่อเฮาได้หนูมาแล้วกะเอามาถอนขน(เฮ็ดให้มันตายก่อนเด้อละ) กะคือให้เอาน้ำฮ้อนลวกๆจั๊กหน่อยแล้วกะขูดๆเอาขนออก บาดหนิกะเอาหนูไปลนไฟจั๊กหน่อย แล้วจังเอาไปล้างน้ำ จากนั้นกะจัดการคัวโลด ผ่าท้องเอาไส้เอาขี้ออก ตัดตีนตัดหาง บ่ต้องขี้เดียดๆ นี่ละของแซบบอกเลย จากนั้นกะเอาเครื่องมาหมัก กะสิมีกระเทียมทุบๆ โรยเกลือจั๊กนิด ใส่ผงชูรสจั๊กหน่อย คลุกๆให้เครื่องเข้าเนื้อแล้วกะเอามาปิ้ง สิใช้เหล็กปิ้งหรือสิใช้ไม้จ่าม(ไม้ไผ่ใช้ปิ้ง)กะได้ ปิ้งใส่เตาถ่านใช้ไฟปานกลางกลิ่นนี่สิหอมคั๊ก พอเนื้อหนูเริ่มเหลืองสุกแล้วกะใส่จาน กินกับข้าวเหนียวร้อนๆเด้อคะเด้ออ แซบบ่แบ่งไผเลยหละ ผู้เฒ่าเขาว่า ซดเหล้าขาวจั๊กเป็กปานขึ้นสวรรค์เพิ่นว่ะ เอาเป็นว่าถ้าบ่เชื่อหนูข้าวเม่ากะลองไปหามาชิมเบิ่ง รับรองติดใจหลาย ติดตามเมนูเปิบพิสดารได้ใหม่ครั้งหน้ากับหนูข้าวเม่าใน Zappnuar.com เด้อจ้าา